नसामुक्ति अभियन्ता डा. पिताम्बर अवस्थी धनगढीमा अभिनन्दित

धनगढी—नसामुक्ति अभियानका अभियन्ता शैक्षिक एवम् प्राज्ञिक व्यक्ति डा. पिताम्बर अवस्थी अभिनन्दित भएका छन्। उनलाई धनगढी नमुना प्राविधिक माध्यमिक विद्यालय धनगढीले अभिनन्दित गरेको हो। उनीसँगै कृष्ण मन्दिरकी प्रधान पुजारी मञ्जुला अवस्थीलाई सम्मान तथा अभिनन्दन गरिएको छ।

डा. पीताम्बर अवस्थीले धनगढी नमुना प्राविधिक माध्यमिक विद्यालयका विद्यार्थीहरूलाई लागूऔषध तथा दुर्व्यसनविरुद्ध प्रशिक्षण दिएका थिए। उनले आफ्नी आमाको नाममा “हरूली आमा छात्रवृत्ति” धनगढी नमुना प्राविधिक माध्यमिक विद्यालयका महिला विद्यार्थीलाई १६ हजार राशिको छात्रवृत्तिसमेत प्रदान गरेका छन्। प्रधानाध्यापक लक्ष्मण दत्त भट्टले छात्रवृत्तिको नगद रकम बुझेका थिए।

विद्यालय व्यवस्थापन समितिका अध्यक्ष उपेन्द्रराज जोशीको अध्यक्षतामा भएको कार्यक्रममा स्वागत मन्तव्य प्रअ भट्ट र सञ्चालन शिक्षक गणेश नेपालीले गरेका थिए। कार्यक्रममा साहित्यकार हेमबाबु लेखकले विद्यार्थीहरूलाई उत्प्रेरणात्मक मन्तव्य व्यक्त गरेका थिए।

गजलकार उषा जोशीले गजल वाचन गरेकी थिइन्। सुदूरपश्चिमाञ्चल साहित्य समाजका अध्यक्ष तीर्थराज पाण्डेय, साहित्यकार एमके सलेनी र भारत पिथौरागढका अजय अवस्थीलगायतको कार्यक्रममा उपस्थिति रहेको थियो। नसामुक्ति अभियानका अभियन्ता अवस्थी भारतको पिथौरागढ बस्दै आएका छन्।