‘सी’ डिभिजन लिगमा महावीरको विजयी सुरुवात

काठमाडौं– शहिद स्मारक ‘सी’ डिभिजन लिगअन्तर्गत आज सम्पन्न खेलमा महावीर क्लब विजयी भएको छ । सातदोबाटोस्थित एन्फा कम्प्लेक्समा भएको उद्घाटन खेलमा ऊ स्पोर्ट्स एकेडेमी साँगाविरुद्ध २–१ ले विजयी भएको हो ।

महावीरको जितमा सुरज थारू र रोमन तामाङले १–१ गोल गरे भने साँगाका लागि समन श्रेष्ठले १ गोल फर्काए । सुरुवाती अग्रता जोगाउन नसक्दा साँगा स्तब्ध बन्न पुग्यो । खेलको २८ औं मिनेटमा सजनले गोल गर्दै साँगालाई सुरुवाती अग्रता दिलाएका थिए ।

५५ औं मिनेटमा सुरजले पेनाल्टीमार्फत गोल गर्दै महावीरलाई १/१ को बराबरीमा ल्याए । ९० औं मिनेटमा रोमनले गोल गरेपछि उत्कृष्ट पुनरागमन गर्दै महावीरले २–१ को रोमाञ्चक जित हात पार्‍यो ।

जितसँगै महावीरले तीन अंक जोड्दा साँगाले हारबाट प्रतियोगिताको सुरुवात गरेको छ ।

आज हुने दोस्रो खेलमा आरसी ३२ फुटबल एकेडेमी र खालबारी युथ फुटबल क्लब दिउँसो पौने १ बजे आमने सामने हुनेछन् ।

त्यस्तै, आजै बेलुकी तेश्रो खेलमा अपराह्न ४ बजे पुलचौक स्पोर्ट्स क्लब र प्लानिङ ब्वाइज युनाइटेडबीच प्रतिस्पर्धा हुनेछ ।