गजल : लोकेश जलन

सल्यानको बनगाड कुपिन्डेमा जन्मिनुभएका गजलकार लोकेश जलन पछिल्लो समय नेपाली गजल क्षेत्रमा पृथक शैलीबाट गज्जबका शेर लेख्ने गजलकारका रुपमा चिनिनुहुन्छ । आफ्नो वास्तविक यथार्थ भोगाइ र कल्पनालाई गजलका शेरहरुमा सजिलैसँग चित्रण गर्न सक्ने गजलकार नेपाली गजलमा निरन्तर साधना गरिरहनु भएको छ । बिम्बमा गजल लेख्न सिपालु गजलकार जलनको गजल पढेर प्रतिक्रिया दिनुहोला ।

गजल
के निहुँ पाउ भन्नेलाई झन निहुँ पाउने बाटो हुन्छ !
ऊ भुब्रो हो हात नहाल छोरा भुब्रोमा आगो हुन्छ !

जिब्रो काट्दैमा नसोच्नुस बिचारको लडाइँ जिते ।
फाली भाँच्चे पनि महोदय हलोसग हतासो हुन्छ !

लेख्न त परिक्षामा मेचिकाली हाम्रो हुन् लेखियो ।
सायद उत्तरपुस्तिका नजाच्दै देश अर्काको हुन्छ !

थोरै महँगो हो आमा लैजानोस यहीँ सेतो पटुकी ।
बाँच्दा भोको पेटलाइ डोरी हुन्छ मर्दा कात्रो हुन्छ !

उनिले प्रेमको हत्या गरिन् मैले आफ्नो हत्या गरे ।
उनलाइ पनि थाहा थियो एक्लै बाच्न गाह्रो हुन्छ !
लोकेश जलन
सल्यान